Azərbaycan Respublikasının Niderland Krallığındakı Səfirliyi və Azərbaycan Diasporuna Dəstək Fondunun təşkilatçılığı ilə keçirilən tədbir Muzey meydanında yerləşən tarixi Concertgebouw-da (“Konsert Məkanı”) baş tutub.

Konsertdə Azərbaycanın Niderland Krallığındakı Səfirliyinin heyəti, Azərbaycan Diasporuna Dəstək Fondunun icraçı direktoru Əkrəm Abdullayev, xarici ölkələrin Niderland Krallığında akkreditə olunmuş səfirləri və diplomatik korpusun nümayəndələri, Niderland Krallığının ictimai-siyasi xadimləri, Azərbaycan və türk icmalarının üzvləri, yerli ictimaiyyətin nümayəndələri iştirak edib.

Tədbirdə “Cəngi” etno-caz qrupunun ifasında Azərbaycan və dünya klassiklərinin əsərləri ilə yanaşı, Azərbaycan xalq və caz musiqiləri də səsləndirilib.

Qeyd edək ki, Niderland Krallığında ilk dəfə baş tutan “8 Noyabr-Zəfər Günü"nə həsr olunmuş konsert tamaşaçıların və yerli ictimaiyyətin böyük marağına səbəb olub və gurultulu alqışlarla qarşılanıb.