Dekabrın 15-də Paris şəhərində Azərbaycan Diasporuna Dəstək Fondunun dəstəyi, pianoçu Səidə Zülfüqarovanın təşkilatçılığı ilə dahi Azərbaycan bəstəkarı Üzeyir Hacıbəylinin anadan olmasının 140 illiyi münasibətilə konsert proqramı keçirilib.
Tədbirdə Azərbaycan Respublikasının Fransadakı səfiri Leyla Abdullayeva, YUNESKO-nun  Sülh naminə incəsənət xadimi Hedva Ser, eləcə də Monqolustanın Fransadakı səfirliyinin nümayəndəsi iştirak edib. Konsertdə, həmçinin müasir musiqi yaradıcılığının tanınmış simalarından olan bəstəkar Graciane Finzinin iştirakı bədii ictimaiyyətin bu mədəni hadisəyə böyük marağını nümayiş etdirib.
Konsert proqramı Üzeyir Hacıbəylinin musiqi irsinin əsas incilərindən biri olan “Aşıqsayağı” əsəri ilə açılıb. Azərbaycan musiqi ənənəsində dərin köklərə malik bu simvolik əsər axşama milli musiqi irsi ilə XX əsr müasirliyi arasında bədii dialoq ovqatı bəxş edib.
Daha sonra proqramda Dmitri Şostakoviç, Oktay Zülfüqarov və Azər Rzayevin əsərləri səsləndirilib. Bu seçim Avropa və Azərbaycan musiqi estetikasının zəngin bədii mübadiləsini əks etdirib. Əsərlər pianoçu Səidə Zülfüqarova, violonçel ifaçısı Guillaume Martigné və skripkaçı Florian Maviel tərəfindən yüksək peşəkarlıqla təqdim olunub. İfaların keyfiyyəti, tembrlərin harmoniyası və dərin ifadəliliyi tamaşaçılar tərəfindən böyük rəğbətlə qarşılanıb.
Tədbir Üzeyir Hacıbəylinin – Azərbaycan klassik musiqisinin banisinin irsinə ehtiram olmaqla yanaşı, XX əsr musiqi repertuarının zənginliyini və müasirliyini də ön plana çıxarıb.